ఈ సంవత్సరంలో రెండవ మరియు చివరి సూర్యగ్రహణం డిసెంబర్ 4, 2021న కనిపించనుంది. ఈ ఏడాది జూన్ 10న అంతకు ముందు జరిగిన వార్షిక సూర్యగ్రహణంతో పోల్చితే డిసెంబర్ 4న ఏర్పడే సూర్యగ్రహణం సంపూర్ణ సూర్యగ్రహణం గా చెప్పబడుతుంది.

ఈ సంపూర్ణ సూర్యగ్రహణం పూర్తి వివరాలు ఏంటో చూద్దామా.. డిసెంబర్ 4 సూర్యగ్రహణం యొక్క మొత్తం వ్యవధి 4 గంటల 8 నిమిషాలు కాగా భారత కాలమానం ప్రకారం (IST), పాక్షిక సూర్యగ్రహణం ఉదయం 10:59 గంటలకు ప్రారంభమై, సంపూర్ణ సూర్యగ్రహణం మధ్యాహ్నం 12:30 గంటలకు ప్రారంభమవుతుంది మరియు గరిష్ట గ్రహణం మధ్యాహ్నం 01:03 గంటలకు సంభవిస్తుంది. పూర్తి గ్రహణం మధ్యాహ్నం 01:33 గంటలకు ముగుస్తుంది. చివరకు పాక్షిక సూర్యగ్రహణం మధ్యాహ్నం 3:07 గంటలకు ముగుస్తుంది.

ప్రపంచవ్యాప్తంగా అనేక ప్రాంతాల నుండి సూర్యగ్రహణం కనిపిస్తుంది. కానీ ఇది భారతదేశం నుండి కనిపించదు. ఈ సూర్యగ్రహణం అంటార్కిటికాతో పాటు దక్షిణ అమెరికా, ఆస్ట్రేలియా, దక్షిణాఫ్రికా మరియు దక్షిణ అట్లాంటిక్‌లోని దేశాల నుండి కనిపిస్తుంది. సూర్య గ్రహణాన్ని చూడాలని అనుకునే వాళ్లకు నాసా అవకాశం కల్పిస్తోంది. అంటార్కిటికాలోని యూనియన్ గ్లేసియర్ నుండి చూడడానికి NASA ప్రత్యక్ష ప్రసారం చేయనుంది. డిసెంబర్ 4న సూర్యగ్రహణాన్ని NASA యొక్క YouTube ఛానెల్‌లో ప్రత్యక్ష ప్రసారం చేయబడుతుంది. ప్రత్యామ్నాయంగా NASA యొక్క అధికారిక వెబ్‌సైట్ నుండి కూడా సూర్యగ్రహణాన్ని వీక్షించే అవకాశం ఉంది.