టార్కో ఏవియేషన్‌కు చెందిన విమానం సూడాన్‌ రాజధాని ఖార్టూమ్‌ నుంచి ఖతార్‌ బయలుదేరింది. విమానం టేకాఫ్‌ అయిన కొద్దిసేపటికే కాక్‌పిట్‌లో వచ్చిన పిల్లి పైలట్‌పై దాడి చేయడంతో విమానాన్ని అత్యవసరంగా ల్యాండ్ చేశారు. ఆ పిల్లి అసలు విమానంలోకి ఎలా వచ్చిందనే విషయం మీద స్పష్టత లేదు. బహుశా రాత్రి విమానాన్ని శుభ్రం చేసే సమయంలో ఆ పిల్లి అక్కడే నక్కి ఉంటుందని అనుకుంటున్నారు. ఈ ఘటనపై టార్కో ఏవియేషన్‌ ఇప్పటివరకు స్పందించలేదు. ఇలాంటి సంఘటనలు జరగడం ఇదే మొదటిసారి కాదు. గతంలో ఇలాంటి సంఘటనలు జరిగినప్పుడు విమానాన్ని గంటల తరబడి నిలిపివేసిన సంఘటనలు కోకొల్లలుగా ఉన్నాయని సిబ్బంది చెప్తున్నారు.