భారత్ నేపాల్ దేశాల మధ్య మళ్ళీ సరిహద్దు విషయంలో వివాదం నెలకొంది. భారత సరిహద్దు ప్రాంతాలు లింపియాధురా, లిపులేక్‌, కాలాపానీలు. ఇవి నేపాల్ దేశంలో అంతర్భాగం. లిపులేక్ లో భారత్ పలు నిర్మాణాలు, రోడ్ల విస్తరణ పనులు చేపట్టడంతో ఈ విషయంపై నేపాల్ ప్రభుత్వం స్పందిస్తూ.. తమ సరిహద్దు ప్రాంతంలో భారత్ చేపట్టిన నిర్మాణాలను అపాలని, తాము భారత్ తో సరిహద్దు విషయంలోని సమస్యలను చర్చల ద్వారా పరిష్కరించుకోవాలని కోరుతున్నట్లు స్పష్టం చేసింది.

అయితే నేపాల్ రాజధాని ఖాట్మండులోని భారత రాయబార కార్యాలయం నేపాల్ తో సరిహద్దు విషయంలో భారత్ స్పష్టమైన వైఖరిని కలిగి ఉందని, నేపాల్ అంగీకరించిన ప్రాంతాల్లోనే భారత్ నిర్మాణ కార్యకలాపాలు చేపట్టినట్లు ప్రకటించింది. ఈ ప్రకటన వెలువడిన తర్వాత నేపాల్ ప్రభుత్వం భారత్ నిర్మాణం అపాలంటూ స్పందించింది. ఇంకో వైపు లిపులేక్‌లో భారత్‌ చేపట్టిన రోడ్డు నిర్మాణానికి వ్యతిరేకంగా నేపాల్‌లో ప్రదర్శనలు కూడా జరుగుతున్నాయి.

లింపియాధురా, లిపులేక్‌, కాలాపానీ లు నేపాల్ భూభాగాలని నేపాలీ కాంగ్రెస్ పార్టీ పునరుద్ఘాటించింది. అంతేకాదు కాలాపానీ ప్రాంతంలో మోహరించిన భారత సైన్యాన్ని తక్షణమే ఉపసంహరించుకోవాలని, చారిత్రక వాస్తవాలు,సాక్ష్యాల ఆధారంగా ఉన్నత స్థాయి చర్చల ద్వారా సరిహద్దు వివాదాన్ని సామరస్యంగా పరిష్కరించుకోవాలని భారతదేశాన్ని కోరింది. 1816 నాటి సుగౌలీ ఒప్పందం ఆధారంగానే నేపాల్, భారత్ మధ్య సరిహద్దు వివాదాన్ని పరిష్కరించాలని నేపాలీ కాంగ్రెస్ తెలిపింది.

నేపాల్ కాంగ్రెస్ ప్రధాన కార్యదర్శి బిశ్వ ప్రకాష్ శర్మ ,గగన్ థాపా సంయుక్తంగా ఓ ప్రకటన రిలీజ్ చేశారు. దానిలో లిపులేఖ్‌లో భారతదేశం రహదారిని నిర్మించడం నేపాల్-ఇండియా జాయింట్ కమిషన్‌లో పేర్కొన్న నిబంధనను ఏకపక్షంగా ఉల్లంఘించడమేనని పేర్కొంది. మరియు ఇరు దేశాల మధ్య వివాదం.. అలాగే వివాదాన్ని దౌత్య యంత్రాంగం (ఇండియా నేపాల్ ల్యాండ్ డిస్ప్యూట్) ద్వారా పరిష్కరించుకోవాలని సూచించింది. ‘ద్వైపాక్షిక ఒప్పందాన్ని ఉల్లంఘిస్తూ లిపులేఖ్‌లో భారత్‌ రోడ్డు నిర్మాణం చేపట్టడం తీవ్రమైన, అభ్యంతరకర విషయమని, దానిని వెంటనే నిలిపివేయాలని’ పేర్కొంది.