వార్తలు (News)

శ్రీవారి దర్శనానికి వెళ్తుంటే ఈ నిబంధనలు పాటించండి..??

తిరుమల శ్రీవారి దర్శనానికి వచ్చే భక్తులు సంఖ్య పెరుగుతుండటంతో తిరుమల తిరుపతి దేవస్థానం బోర్డు కీలక నిర్ణయం తీసుకుని దర్శనానికి వచ్చే భక్తులకు పలు నిబంధనలు విధించింది. శ్రీవారి దర్శనార్థం తిరుమలకు వచ్చే భక్తులు రెండు డోసుల వ్యాక్సిన్ వేయించుకున్న సర్టిపికెట్ తప్పనిసరిగా చూపాలని ఆలయ ఈవో జవహార్ రెడ్డి స్పష్టం చేశారు. లేనిపక్షంలో మూడు రోజుల ముందు కరోనా పరీక్ష చేయించుకున్న నెగెటివ్ సర్టిఫికెట్ అయినా తీసుకురావాలన్నారు. టీటీడీ ధర్మకర్తల మండలి సభ్యకార్యదర్శిగా ఈవో జవహార్ రెడ్డి ప్రమాణ స్వీకారం చేసిన అనంతరం మీడియాతో మాట్లాడుతూ అక్టోబర్ 1వ తేదీ నుంచి ఈ విధానం అమల్లోకి వస్తుందన్నారు.

12 సంవత్సరాలలోపు ఉన్న పిల్లలకు ఈ నిబంధన నుంచి సడలింపు ఇస్తున్నట్లు, ఆధార్ కార్డు తప్పనిసరి అని ఆయన తెలిపారు. ఇక 12 సంవత్సరాల నుంచి 18 సంవత్సరాల వయస్సు గల వారికి దర్శనం తేదీ నుంచి 72 గంటల ముందు కరోనా నెగిటివ్ సర్టిఫికెట్ తప్పనిసరి అన్నారు. 18 సంవత్సరాల పైబడిన వారికి రెండు డోసుల వ్యాక్సీన్ వేసుకున్న సర్టిఫికెట్, లేదా కరోనా నెగిటివ్ సర్టిఫికెట్ తప్పనిసరి అని ఈవో స్పష్టం చేశారు. కానీ ఈ నిబంధనలపై సెప్టెంబర్ 30వ తేదీ వరకు సడలింపు ఉంటుందని, అక్టోబర్ 1వ తేదీ నుంచి పక్కా అమలు చేయడం జరుగుతుందని ఈవో చెప్పారు. శ్రీవారి దర్శనానికి వచ్చే ప్రతీ ఒక్కరూ కోవిడ్ నిబంధనలు పాటించాలని సూచించారు.

శ్రీవారి బ్రహ్మోత్సవాలు అక్టోబరు 7వ తేదీ నుంచి 15వ తేదీ వరకు ఏకాంతంగా నిర్వహించడానికి ఆలయ అధికారులు అన్ని ఏర్పాట్లు చేస్తున్నారు. త్వరలోనే బ్రహ్మోత్సవాలకు సీఎం జగన్‌ను ఆహ్వానిస్తామని ఈవో జవహర్ రెడ్డి తెలిపారు. ఈ నేపథ్యంలో శ్రీవారి దర్శన టికెట్ల కోసం భక్తుల నుంచి ఊహించని పోటీ వస్తోంది. తాజాగా ఒక దర్శన స్లాట్ కోసం దాదాపు 5.5 లక్షల మంది పోటీ పడినట్లు టీటీడీ అధికారులు తెలిపారు. అక్టోబర్ నెలకు సంబంధి రూ. 300 ప్రత్యేక ప్రవేశ దర్శన టికెట్లను శుక్రవారం నాడు విడుదల చేసిన విషయం తెలిసిందే. ఆన్‌లైన్‌లో ఈ టికెట్లను విడుదల చేసిన వెంటనే.. 1.06 లక్షల మంది సైట్‌లో లాగిన్ అయ్యారు. క్షణాల వ్యవధిలోనే ఆ సంఖ్య 5.5 లక్షలకు చేరుకుంది. ఇంత పోటీని చూసి టీటీడీ అధికారులు ఆశ్చర్యపోయారు.

close

Don’t miss the Latest News

We don’t spam! Read our privacy policy for more info.

  •  
    1
    Share
  • 1
  •  
  •  
  •  
  •